مقالات وتقارير

 

بقلم / نسرين معتوق 

إذا كنت من الناس إلي بتميل للتحليل و النظر بإمعان للبشر و لأحوالهم فأظن أنه من السهل أوي إنك تدرك و ببساطة إن الحب هو مشكلتهم الرئيسية و في نفس الوقت هو كلمة السر إلي بيها تتحل أغلب مشاكلهم ، إذا لم تكن كل مشاكلهم .

الحب هو أقوى المشاعر الإنسانية و أرقاها على الإطلاق ، و هو أول لغة بيتعلمها الإنسان و بيترجمها بدون الحاجة إلي الكلمات .. كانت كافية جداً للوليد لمسة الأيد الحنينة و الإبتسامة الناعمة و دفء نظرة العين ، علشان يتوقف عن البكاء و يشوف بقلبه قبل ما عينه تشوف ملامح إلي ضمته و يطمن و يهدأ و يسكت ، لإن قلبه حس الحب .

و نكبر و يكبر معانا الإحساس ده و يفضل هو الأمان لينا ، صحيح نوع الحب إلي بنحتاجه من إلي حوالينا بيختلف باختلاف أدوارنا في حياة بعض ، بس الحقيقة إن كل علاقاتنا بتدور حواليه ، و لما بيضيع مننا بنعيش ندور عليه ، أحياء .. نعم ، لكن عايشين .. لا .
و نفضل نكبر و يفضل الحب هو الدواء لكل إلي بيوجعنا ، و بيه هو بس نستحمل حاجات لو من غيره ما كناش ممكن نستحملها .
و به نقدم أغلى ما عندنا .. أعمارنا و ممكن كمان أرواحنا بنفوس راضية و عيون قريرة ، لإن الحب وهب لكل الحاجات إلي كانت ممكن أوي تبقى من غيره عادية .. القدسية .. قدسية الحب .
و تفضل محاولة فهم الحب غاية لناس كتير ، و في رحلتهم دي بيفضلوا يدوروا بين إللي بيدي الحب و هو مش مستني حاجة و إللي عايز يأخذ حب و ما يديش أي حاجة و إللي بيحاول يحسبها مع إن عمر ما حد عرف يضبط حساباتها .. النتائج دايماً مختلفة بس إللي لا يمكن يُختَلف عليه هو إن الحب أجمل ما وهب الله لقلوب المخلوقات مش البشر بس .
فعيشوا و رققوا قلوبكم بيه ، و خلوا ألوانه و نوره ينعكسوا على كل حياتكم و حياة إلي حواليكم ، و ما تستسلموش للي بيقلل من الحب ولا للي بيهزأ منه .. لإن من غيره تتحول دنيانا لجحيم ، و ما تندموش على يوم قدمتوه فيه و هزمكم ، لأن أكيد المحب الحقيقي عارف إن حبه في حد ذاته كان هو القيمة .

اظهر المزيد

مقالات ذات صلة

زر الذهاب إلى الأعلى
إغلاق
إغلاق