أدب

متشوقون للشاعر بكري جابر

للشاعر بكري جابر

انتي مش وطن وبس

لا والله

انتي أكبر من أي كلمة و اي معنى

إنتي الحياة.
يا نهارك اللي بعشقه سبحه و بخور
وإمام يدور
و صبايا دايرة تعشقك حي الحسين
ملناش إيدين نجرح يا قلبي ف توب حبيبتي ال مخملي
لما نصير ( ….. )
يا أم الأمير
والطفل
واللي نايم علي دمع الأمل
ساعة وجع
نتغطى بيكي ف البراح
ما انتي الجناح
بنطير معاكِ ف حلمنا لابعد مدى
وانتي اللي وحدك باشربك شاي ع الفطور
ياااا مبتدا كل الوجود
الموت يموت
لما نصلي ف حضرتك ركعة حياه
ما تعتبنيش
لما بفوت قلبي البرئ جوه حواري جنتك
ويا العدم
وأرحل بعيد
لأبعد مدى
وأشحت رغيف الأمنيه
واوصف جمالك للبيوت
ما انتي اللي موت
و انتي الحياه
وانتِ الرضا
والكفر ….
لما تحرمي طفل الرضاعة إنه يبات
يا ذكريات صبحت عدم
لسه الأمل
كحل ف مراودنا الحنين
لسه العنين فيها حبة ضي من ضحك العيال
بس السنين ….. !!
مدي الخطاوي قصّري كل السكك
هاتي اللي كان
واقف هناك فوق السطوح
و بيزرع الأحلام أمل
متشوقين ….
نشرب فرح
و نشوف وشوش الطيبين تطرح حياه
متشوقين ….
نصبح نغني ع الطريق
ونلملم الحزن الغبي
وندحرج الضحك لمداه
متشوقين نرجع هنا …
نعشق هنا …
ونصلي فيكِ للحياة
متشوقين

الوسوم
اظهر المزيد

مقالات ذات صلة

اترك تعليقاً

زر الذهاب إلى الأعلى
إغلاق
إغلاق
× تواصل معنا عبر واتساب